အနှစ် (၆၀)မြောက်ဖက်ဆစ်တော်လှန်ရေးနေ့ အထိမ်းအမှတ် မဂ္ဂဇင်းမှ ပြန်လည်ကူးယူဖော်ပြထားပါသည်။ အမျိုးသားစာဆိုတော်ကြီး ဆရာကြီးဦးတင်မိုး၏ ကဗျာအများစုသည် မြန်မာပြည်စစ်အာဏာရှင်လက်အောက်မှ လွတ်မြောက်ဖို့ အတွက် ရဲစိတ်ရဲမာန်သွင်းပေးသော ရဲရဲတောက်ကဗျာများဖြစ်ပါသည်။ ဆရာကြီး ကောင်းရာသုဂတိလားပါစေ။
သမိုင်းအုတ်တချပ်ဆင့်ဖို့
အသက်နဲ့တောင် ရင်းခဲ့ရ
ခံပြင်းတက်ခေါက်
စိတ်တွေလဲ မီးတောက်
ဒူးထောက်သူ ရင်ကော့သူ
လူအမျိုးမျိုးနဲ့ကြုံ
သူပုန် တဖြစ်လဲ
အောင်ပွဲရဖို့ ရှေ့ချီတက်
လက်တွဲစို့ရဲဘော်
အနာဂတ်ကို မျှော်ကြမယ်။
ကိုယ်ကျိုးကို မြေမြှုပ်
ကိုယ့်အထုပ် ကိုယ်မပိုက်
တိုက်ပွဲသာ အသက်
တိုက်ရဲတာ လက်နက်
သွေးစက်စက် ကျပေစေ
အုတ်မြစ်ချလူ့ဗိမာန်
အကျည်းမတန်စေရ။
လူမှန်ရင်သတ္တိရှိရမယ်
အသိစိတ်မြင့်မား
တရားကိုချစ်တတ်ရမယ်။
အမှားနွံမနစ်
တရားမွန်ချစ်တတ်မှ
လောကသစ်အုတ်တချပ်
အနာဂတ်အတွက် စီနိုင်မယ်။
အောင်လံထူဖို့
လွယ်ကူတဲ့ အလုပ်မဟုတ်။
အချောင်ကံထလို့
အောင်လံမရနိုင်။
နောင်အမြဲလှစေဖို့
အောင်ပွဲအရ ချီတက်လော့။ ။
တင်မိုး
၂၈၊၀၁၊၂၀၀၅
သောကြာနေ့လယ်ခင်း
